Álgge lahttun

Álgge lahttun

  • Čáláthan vel govas oaidnu mearkkaid/sániid gieddái sihkkarasttin dihtii!

 

Lahttovuohta

SSN:ide sáhtát searvat, go deavddát lahttoskovi (interneahtas dahje dábálaš páberveršuvnna). Gávnnat interneahttaskovi min neahttasiidduin “Searvva lahttun” -oasis. Páberveršuvnnaid mii juohkit iešguđetlágan dáhpáhusain. Go sáddet skovi midjiide, oaččut lahttomáksoskovi šleađgapoasttain. Go mii leat ožžon mávssu iežamet kontui, sáddet sihkkarastindieđu. Dáinna du SSN-lahttovuohta sihkkarastojuvvo.

Sáhtát válljet iešguđetlágan lahttovuođaid gaskkas. Áiddosaš lahttun sáhttet ohcat 13-30-jahkásaš sámenuorat. Jagi 2014 jahkečoahkkimis mearrideimmet, ahte das ovddosguvlui váldit olbmuid dušše áiddosaš lahttun, muhto dan giđa rádjái nannejuvvon jahkelahttovuođat bissot gal fámus. Jahkelahttomáksu lea 5 €/jahki. Agibeailahttomáksu lea 20 euro ja dan ii dárbbaš máksit go oktii.

Áiddosaš lahttovuohta bistá dassážii, go deavddát 30 jagi. Guottihanlahttovuohta lea oaivvilduvvon buot olbmuide ja fitnodagaide, geat/mat hálidit duvdit sámenuoraid doaimma Suomas. Guottiheaddjit válljejit mávssu ieža, goittotge unnimustá 50 euro.

SSN-lahttun beasat oassálastit Sámi buoremus nuoraiddáhpáhusaide. Okta giđa somámus dáhpáhusain leat sisbandy sámemeašttirgilvvut, main SSN lea beaggán jo máŋggaid jagiid. Jagi 2012 gilvvuin Ubmis SSN ávvudii dubbalvuoittu, go sihke nissoniid ja dievdduid joavkkut vižže gollemedáljjaid suomabeale Sápmái. Jus hálidat, beasat speallat SSN-joavkkuide, go searvvat SSN lahttun.

Min searvvis leat dál sullii 130 lahtu.

Juohke jahkečoahkkimis searvái válljejuvvo ođđa stivra. Jahkečoahkkima oktavuođas ordnet maid eará doaluid. Ovdamearkka dihte maŋimuš jahkečoahkkimis Gáregasnjárggas giđđat 2012 SSN ordnii Hansabáras hávskkes doaluid, gos čuojahedje Ailu Valle ja Irdon. SSN máksá lahtuidis mátkegoluid ja idjadeami jahkečoahkkimis.

Sámedáhpáhusat lea dehálaččat. SSN hálida oahpásmuhttit sámenuoraid dáhpáhusaide ordnemiin lahttodeaivvademiid dáid oktavuođas. Skábmagovat Anáris, Heahtá Márjjabeaivvit, riikkaidgaskasáš eamiálbmotfestivála Riddu Riđđu Norggas ja Ijahis Idja -festivála leat ovdamearkkat dáhpáhusain, maidda SSN lea oassálastán jo máŋggaid jagiid. Reaiso- ja dáhpáhusideaid oažžu álot evttohit midjiide! SSN hálida duvdit lahtuidis oassálastima dáhpáhusaide, ja máksá oassálastiid idjadan- ja/dahje mátkegoluid dáhpáhusaid áigge. Mii almmuhit dáin álot sierra.

SSN sádde lahtuide dieđáhusaid 2-6 geardde jagis šleađgapoasttain. Ná sáhtát álkit čuovvut, mii searvvis dáhpáhuvvá. Mii leat plánemin dál maid iešguđetlágan dávviriid ja biktasiid iežamet lahtuide.

Min neahttasiidduin gávnnat áigeguovdilis dieđu SSN doaimmas, sápmelaččain, Sámi dáhpáhusain, eamiálbmogiin ja riikkaidgaskasaš eamiálbmotdáhpáhusain. Siidduin gávdnojit maid min oktavuohtadieđut, ja sáhtát váldit oktavuođa midjiide jus/go bohciidit jurdagat, hálidat čovdosa muhtin dillái dahje jus hálidat evttohit midjiide ođđa doaibmavugiid. Sáhtát oahpásmuvvat SSN doibmii dárkilabbot maid min blogga bokte. Bloggas gávnnat dieđuid mearrádusain ja dáhpáhusain, maidda miige leat váikkuhan. Gávnnat min maiddái Facebook:as namain SSN – Suoma Sámi Nuorat. SSN dáhpáhusaid bovdehusaid sáddet Facebook-joavkku olbmuide.

Buot dehálamos goittotge lea, ahte go searvvat SSN lahttun, oaččut dievva ođđa oahppásiid, skihpáriid, verddiid ja soul matiid agibeaivái. Searvi geahččala čohkket buot suomabeal sámenuoraid oktii, ja lasihit ovttasbarggu maid riikkarájáid rastá ja eará eamiálbmotnuoraiguin. Somás dáhpáhusat ja mátkkit veahkehit oahpásmuvvat ođđa ja miellagiddevaš báikkiide ja olbmuide.